locales-wa-xxx.rpm
Po Linux esse capåbe do mostrer des scrîts (do tecse) walon comifåt, i doet saveur les kés côdes sont des letes pol fonccion isprint() et des ôtes aparintêyes. Si tot va bén, vosse Linux a ddja çu k' i fåt po l' eternåcionålijhaedje (i18n); do côp, i n' lî fåt pus k' ene definicion di "locales" po vosse lingaedje. Dj' a fwait ene locåle walone po Linux, avou on côp di mwin da Lorint Hendschel. Vochal l' esplikêye del locåle:
|
locales-wa-xxx.rpm |
Vochal les mwaisses fitchîs pol lingaedje walon. Vos nd avoz dandjî po håyner les caracteres walons ecôdés so ût bits, po l' arindjmint alfabetike eyet po rprezinter les dates eyet les nombes e walon. |
|---|
L' ecôdaedje eployî pol walon dizo Unix est li minme ki po les ôtes lingaedjes di l' Urope di l' ouwess, par egzimpe li francès, l' almand, evnd. (et vos nd åroz).
Dins les payis eyu çk' on djåze li walon (li Walonreye [sud
del Beldjike] et on tot ptit boket del France), les tapreces k' on s' è
sieve normålmint (francesses ou bedjes) convnèt po saveur taper
totes les letes do walon, a pus ki Å.
Po-z aveur cisse lete la, fijhoz insi:
Dizo X11, vos l' poloz obtini tot tapant compose + A
+ *; dins ene conzôle, avou compose + A + A. Come di djusse,
ci n' est nén målåjhey do defini des novelès
manires d' intrer ci caractere la, soeye-t i tot rapontiant (reconfiguring)
vosse taprece, soeye-t tot radjoutant des novelès façons di
compôzer.
Dj' a metou vaici on ptit fitchî
tar.gz avou bråmint des ptitès usteyes foirt ahessåves
ki dji m' è sieve mi-minme, metans: èn inputrc et
ossu des definicions di compôzicions amidrêyes pol conzôle
eyet po X11. Avou ça, vos pôroz intrer Å dins
tos les cas, avou compose + A + A ou compose + A + O,
a vosse môde.
Li tape (key) po compôzer est defineye come Compose el
conzôle, et come Multi_key dvins X11. Po ki AltGr + / (so
ene taprece bedje) soeye vosse tape "compose", vos poloz taper çu
ki shût :
Li walon eploye li minme ecôdaedje ki les lingaedjes di l' Urope di l' ouwess. Do côp, vos vos poloz siervi des minmès fontes latin1 eto.
Come di djusse, vos vôrîz bén ki les programes ki vos
inmez li mî djåzexhe vosse lingaedje...; sacwantès djins
ont ataké a fé cist ovraedje la, mins i gn årè
pont di miråke. Ça n' si frè nén tot seu et
vos estoz bénvnou(we) po dner on côp di mwin.
Avou les libes programes, vos avoz l' ocåzion del fé;
les vindeus di programes comerciås ni vos dinront måy ciste
ocåzion la. Vos estoz libes, vos estoz seus mwaisses di çu
ki vos tchoezixhoz ! Praticmint, ça vout dire ki vos poloz
ratourner les programes si vos nd avoz eveye. I gn a nou mwaisse
programe (OS) ki vos laireut cisse tchuze la.
Lorint a ratourné sacwants programes di l' evironmint KDE eyet des ôtès aplicåcions; vos trovroz si ovraedje eyet comint fé po-z astaler ces programes la so si pådje so Fitchîs ratournés e walon. Et si pådje so Linux e Walon.
Dj' a ossu metou so pîs ene pådje avou les fitchîs po di Gnome et Linux-Mandrake.
Ça m' freut plaijhi ossu di vos fé del plaece po ene djåspinreye (mailing-list) po les ratourneus saveur ovrer et bouter eshonne. Si ça vos interesse, sicrijhoz-mu.
Vos poloz vey sacwantes waitroûlêyes avou des programes e walon chal:
Li pådje do
lingaedje walon
Li waibe del croejhete
walone
Drapea walon
Vochal les fitchîs sourdants (source) po-z astaler li locåle walone: wa_BE.
Po les astaler, copyîz li fitchî wa_BE dins /usr/share/i18n/locales/
. Adon, tapez :
localedef -i wa_BE -f ISO-8859-1 wa
localedef -i wa_BE -f UTF-8 wa_BE.UTF-8
et vos fitchîs /usr/share/locales/wa/LC_* seront
e plaece. Si vos inmez mî, vos poloz ossu aberweter (tcherdjî
so voste éndjole) li paket rpm ki dj' a fwait.
