On coridjeu d' ortografeye e walon po ispell/aspell/myspell/hunspell;
shuvant l' ortografeye do rfondou walon.

Dj' a dvant tot tuzé sol manire di trover les diferinnes fômes codjowêyes
des viebes, gråce a l' aidance da Lucyin Mahin; et poy dj' a metou
les prumirès pådjes di l' esplicant motî walon.

Li tot est so licince libe bén seur.

A FÉ: 
* verifyî ki les fômes dinêyes po les viebes sont les bounes (li motî dene,
  come tos les motîs, l' infinitif; dji n' so nén foirt seur po des viebes
  k' i gn a d' aveur prindou li boune fôme)
* verifyî l' algorite di codjowaedje eployî et sayî d' vey s' i pout
  bén covri tos les viebes erîlés, et si dji n' a pont rovyî des sacwès.


KIMINT L' EPLOYÎ

1) ispell
=========
On fwait l' fitchî *.hash tot tapant "make ispell", et copyî les deus
fitchîs walon.aff et walon.hash dins /usr/lib/ispell
(ou fé "make ispell_install") 

Asteure si vos vloz verifyî on fitchî "foo.txt" e walon, i fåt fé:
	ispell -d walon foo.txt

asteme! ça n' rote bén k' e-n iso-8859-1/15, nén e-n utf-8

2) aspell
=========
On fwait les fitchîs k' i fåt tot tapant "make aspell", et copyî les
fitchîs *.rsw, *.dat et *.multi dins /usr/lib/aspell-0.60/ 
(ou fé "make aspell_install")

3) myspell
==========
On fwait "make wa_dic" po-z aveur li fitchî wa.dic; pol wa.aff,
i sufixh di copyî wa_affix.dat tot l' rilomant.
Dji n' kinoxhe ki OpenOffice.org a-z eployî ç' drole di sistinme la;
eyet i n' ricnoxhe nén des noveas motîs :-( mins on côp ki OOo riconoxhrè
l' walon, i sufixhrè di copyî wa.dic et wa.aff dins
/usr/lib/ooo-2.0/share/dict/ooo/
(ou fé "make myspell_install")


KIMINT L' RAMIDRER

dins l' ridant mots/ dj' a metou sacwants fitchîs, les nos des fitchîs sont
assez simpes po comprinde i m' shonne :) vos î ploz radjouter des novelès
intrêyes, mots, viebes,...
tchaeke intrêye pout aveur onk ou des drapeas (separés do mot par on "/").
Les drapeas sont:
a: addjectif (çoula vout dire a pårti del fôme omrinne dinêye on pout aveur
	les fômes pluriyales, et femrinne). eg: "blanc/a" çoula va covri
	les mots "blanc", "blancs", "blanke", "blankes", "blankès"
s: li mot pout prinde on s po fé on pluriyal
n: drapea po les nos (fwait des fômes femrin et omrin, singulî et pluriyal;
	c' est cåzu come "a", mins sins l' fôme -ès )
i: sititchåve voyale. eg: "sicole/is" ki covere "sicole", "scole", "sicoles"
	et "scoles"
v: viebe erîlé. po les viebes i fåt dner deus fômes: li cene pol schoûtant
	di l' indicatif prezintrece, et li pårticipe erirece omrin;
	a pårti di ces deus fômes, li resse est fwait.
	eg: "tådjes/v" et "tårdjî/v" oudonbén "boes/v" et "boevou/v"
j: li viebe pout fé on mot e-n -aedje, eg: "sicrît/jvi" -> s(i)crijhaedje
	li drapea "j" si mete sol fôme pårticipe erirece do viebe
r: po les mots ki fjhèt ene fôme femrinne e -resse; eg:
	"cinsî/r" --> "cinsî", "cinsîs", "cinsresse", "cinsresses"
	on pot mete les drapeas "n" et "r" po les mots ki ont deus fômes
	femrinnes, eg: "abateu/nr" -> abateu, abateus, abateuse, abateuses,
	abatresse, abatresses 
t: po les viebes ki polèt fé èn addj. e-n -ant; eg: ahåyî/vt --> ahåyant,
	ahåyants, ahåyante, ahåyantes, ahåyantès
	li drapea si mete sol fôme pårticipe erirece do viebe  
c: po les viebes ki fjhèt on mot e-n -ance; eg: amidré/vjtc --> 
	amidrance, amidrances (et ossu amidraedje, cåze do "j", et
	amidrant{,s,e,es,ès} cåze do "t")
m: - po les nos: fwait èn adviebe e -mint; eg: awoureus/am --> awoureuzmint
   - po les viebes: fwait on mot e -mint; eg: abayes/vm --> abaymint(s)
    atincion ki po les viebes li drapea  si mete al fôme do schoûtant di
    l' indicatif erirece, dismetant ki tos les ôtes drapeas (ôtes ki "v" et "i")
    si metèt sol fôme pårticipe erirece.
<rén>: ci mot la et rén d' ôte, nou derivé est fwait (eg: "alans")

Loukîz dvins les fitchîs di mots/* po des egzimpes.



Vola, amuzez vs bén et dijhoz mu çou k' vos è pinsez.


