Ene pitite caricature so mi:

Pitit prezintaedje

Dji so d' oridjine baske pa m' no (Saratxaga, ki vout dire la wice k' i gn a des sås e lingaedje euskara), mins mi famile vike el Amerike dispoy 1613. Dj' a ossu des tåyes, do costé di m' grand-mére, ki vnît del swisses alemanike et del Catalogne. Dj' a skepyî li 23 di nôvimbe 1971, a Santiago do Tchili. Dji vika a Montevideo, Ourougway, djusk' a 1981. Et dji vike a Lidje, Beljike, dispoy ci tins la. (Dispoy 2001 dji so on po pus a l' esse, a Rtene, dilè Fléron)

Cwalifiaedjes

Dj' a fwait des studes d' informatike; et dj' a eto yeu des apriyesses d' administråcion d' éndjoles Unix, di manaedjmint et d' administråcion di rantoeles TCP/IP, di sierveus di news, d' emilaedje, ftp, http (Apache), PPP, insi k' ene apriyesse d' eployaedje et d' apontiaedje di sierveus Samba.

Dj' a eto des nocions di programaedje e C, C++ eyet shell bash.
Asteure dj' overe po Mandriva (dins l' tins MandrakeSoft) wice ki dji fwait li coordinåcion des ratournaedjes des programes et d' el documintåcion. Et do hacking, adaptaedjes eyet eternacionålijhaedje di programes pol distribucion Mandriva Linux.
Dji djåze li francès, li castiyan et li walon, li lingaedje del coine di daegn wice ki dji vike pol moumint. Dj' a eto ene bone cnoxhance di l' inglès (copurade li scrit inglès); dji comprinds l' itåliyin et shure des cours di djaponès å CEJUL.

Activitêyes

Dji so on grand amateu do sistinme GNU/Linux, on libe sistinme d' operance. Dji so mimbe askepieu del soce nén rcwårlante (s.n.r.) R.T.F.M., et mimbe fondateu do Groupe d' Uzeus di Linux di l' Ourougway (UYLUG).

Dj' overe po Mandriva, eterprijhe ki fwait l' sistinme d' operance Mandriva Linux, et dji fwait avancî li sopoirt ki Linux dene po totès sôres di lingaedjes.

Dji so eto soçon del soce nén rcwårlante "Li Rantoele", ene soce ki s' bat po fé cnoxhe li walon et lyi dner li plaece k' i doet aveur. Dji manaedje li dominne "walon.org" eyet lodjî so mi éndjole sacwantès waibes walones dizo ç' dominne la:

• L' esplicant motî do walon, on diccionaire pår e walon, avou des definixhas foirt spepieus, des egzimpes, des imådjes, et ki s' ecråxhe di 150 novelès intrêyes tchaeke moes.
• L' Aberteke, on magzine waloncåzant so les fyis.
• Li waibe do rfondou, ene waibe avou totès sôres di tecses e rfondou: des årtikes di gaztaedje, des tecses d' istwere, di biyolodjeye, politikes, des contes, del powezeye, eyet minme on roman en etir.
• Li codjowaedjes des viebes, li cminçmint d' on "bescherelle" do walon.
• Les pådjes personeles da Loulinne Voye.
• "Berdelaedjes", li prumî forom sol Daegntoele pår e walon.
• ... et co des ôtes.

On ôte di mes cintes d' interet, est li rantoele Fidonet ki dj' endè so mimbe dispoy 1993 et ki m' a permetou, dispoy 1992, di cnoxhe et d' eployî l' emilaedje (di ces trevéns la on cnoxheve nén co l' Eternete chal e nosse payis, do moens les ptitès djins nel cnoxhint nén).
Dji mantna eto ifmail-tx, on programe di pasrele fidonet <--> email/usenet; eyet m' ocupéve, cwand ele egzistéve co, do manaedjmint, avou des ôtes, del pasrele fidonet <--> usenet pol hierartcheye di copinreyes (news) fido.belg.*.

Dj' a leyî mi éndjole e libe accès pa modem dispoy ki dj' a drovou m' BBS Bad WaZOO l' anêye 1993 et disk' a ki m' modem toumaxhe e rak (come i gn aveut pus nolu ki s' raloyive pa modem dj' a leyî ouve).